Lamentu di u castagnu à u corsu

Couplet 1

Or chi l’averaghju fattu

A lu corsu cusì ingratu

Chi m’ha fattu la sintenza

E à morte cundannatu

Senza sente tistimoni

Ne cunsulta lu giuratu.

Couplet 2

M’ha dichjaratu la guerra

Cume à un veru malfattore

M’ha messu li sbiri apressu

Chi m’attacanu terrore.

O Corsu, rifletti un pocu,

Versi me si senza core.

Couplet 3

Cume à un banditu da forca

Tu m’hai messu lu taglione ;

Di tutta la me famiglia

Voli tu la distruzzione.

O Corsu, s’hella ti piace,

Dammi una spiegazione,

Couplet 4

M’hai chjappu a l’arma bianca,

Tu per esse piu sicuru,

Quandu impronti lu mio fiori,

Quandu lu fruttu è sicuru.

Un mi porti alcun rispettu,

O Corsu, si cusi duru!

Couplet 5

Ne voli vede la fine,

Tu un guardi la stagione

Cull’arme sempre in campagna,

A mazzola e u sigone,

Da la matina à la sera,

Batti senza cumpassione.

Couplet 6

Subitu tagliatu à pezzi

E per mettemi in pappina

Chjami li to mulaterri

Per cunducemi à l’usina;

O Corsu, rifletti e pensa

Chi faci la to ruina!

Couplet 7

A un suppliziu senza nome

O Corsu, m’hai cundannatu :

A passà sottu à le seghe

E coce cume un dannatu;

In botte chjirchjate in farru

Sò subitu imprigiunatu.

Couplet 8

Un sentu in tutte le borghe

Che tintenne e tintennoni,

Bestemmie di mulateri,

Lu fiscu di li sigoni,

E di mule, carri e trenni

N’è pienu strade e stradoni.

Couplet 9

E’na guerra dichjarata,

Un è mica guerra finta;

Un si pensa ad altre cose,

Un si pensa che à la tinta.

La mio povera famiglia

S’ella dura è prestu spinta.

Couplet 10

Un ti ne ricordi piu,

Corsu di li tempi andati ?

Di Sampieru e Sambucciu,

Di tutti li to antenati,

Quandu da tanti nemici

Eranu sempre assaltati ?

Couplet 11

Qual’è chi li siccuría,

Chi si dava tanta pena ?

Qual’è chi li mantenía

Ben purtanti, à panza piena ?

Li mio frutti inzucarrati.

O Corsu, rifletti appena !

Couplet 12

Un ti ne ricordi più,

Una sera, à lu fucone

Tutta la to famigliola

Cantava lu lazarone ;

Eramu un vennari sera

Di pane manc’un buccone.

Couplet 13

Qual’è chi ti succurrí,

O Corsu, in quella sirata,

Chi mittiste la paghjola

E feste una pulindata ?

E cusì passaste alegra

U restu di la nuttata.

Couplet 14

Un annu nun ci fù granu

E d’orzu manc’un granellu ;

Fiore tandu un ne sbarcava,

Trimavi da lu tardellu

Chi ti dava Mamma Piera.

E avale un sì più quellu ?

Couplet 15

Qual’è chi ti rilevò,

O Corsu in quella stagione ?

Chi t’empía di pisticcine

Ogni sabatu in curbone ?

Eppo’avale ti sì messu

O Corsu, à fa lu briccone !

Couplet 16

Guarda quante pimpasculate,

Quanti colpi aghju paratu !

Da la fame quante volte,

O Corsu, t’aghju salvatu!

Ed avà da gran nemicu

Versu me sí dichjaratu.

Couplet 17

Ti vindii li me frutti

E’mpattavi li to affari ;

Vistii li to figlioli,

Rigulavi li scarpari ;

Ingrassavi lu purcellu,

Tutti l’anni avii danari.

Couplet 18

Cantava lu mulinaru

Ch’avia pienu lu mulinu,

U cavallu galuppava

Sott’à lu so carruzzinu,

Chi per tuttu lu mio fruttu

Era, O Corsu, un gran festinu.

Couplet 19

Facii porte e purtelli,

Sulai, casce e cascioni,

Intempiavi la to casa

Tu cu travi e cantilloni,

Grazia, O Corsu, eppur la sai,

A li mio gran figliuloni.

Couplet 20

Ancu sin’à la to cascia

Quandu parti à l’altru mondu

Ti furniscu, e sta sicuru,

O Corsu, ch’io non cunfondu ;

Bastardu di Sambucciu,

Almenu rifletti à fondu !

Couplet 21

Quandu la guerra è finita,

Chi sarà di te, mischinu ?

Zappa puru lu to fornu

E chjodi lu to mulinu :

Parterai per lu mondu,

Errente senza un quatrinu.

Couplet 22

Ne farai lu tennifesta,

E lustrarai le botte,

Durmerai cume i cani

Quandu vinerà la notte

Perchè vindetta dumanda

L’alberu di le ballotte.

Couplet 23

Sempre cu li stracci à collu

Passerai piani e muntagne ;

Camperai a erbiglie crude

Racolte nu le campagne,

Perchè vindetta dumanda

L’alberu di le castagne.

Couplet 24

La to cumpagna di strada

Sarà sempre Mamma Piera ;

Per tuttu la truverai,

Sempre ti sarà sincera ;

Ti farà di la so scorta,

Corsu, lu portabandera

Couplet 25

E famitu cume un braccu

Criparai dentru à un fossu.

Li padroni di l’usine

Diceranu : »Tarra addossu,

Chi lu nostr’affare è fattu. »

Pensa bè, rifletti, o Corsu.

Couplet 26

Chi ti poi sempre rimette

Di tutti l’errori e sbagli.

Mandali à fà le sighere

A sa mansa di canagli ;

Cusi abanduneranu

L’usine cu li travagli.

Couplet 27

E lu to caru Castagnu

Risterà duv’ellu è natu,

A lampatti lu so fruttu,

Tantu dolce e inzuccaratu,

E cusì sarai, o Corsu,

Cume nanzu invidiatu.