Scorsa la vita

À a mimoria d’Antone Joanlong, di Carghjese. A morte d’un militante (avia 25 anni) face sempre l’effettu d’un biotu. U ricordu di e so azzione, a piazza ch’ellu accupava à mezu à a so ghjente è in lu muvimentu naziunalistu, ùn pò cà lascia tamanta piaca in li cori. Mà hè ancu più difficiule d’accittà a morte quand’ella ùn pare micca naturale o accidintale… Sinu à ch’ella ùn venga a virità, ci sarà stu dubitu, sta rivolta mai ingullita. À a mimoria d’Antone, da chì a giuventù sappia l’omu ch’ellu hè statu, cio ch’ellu hà fattu pà u so paese è l’esempiu ch’ellu hà datu. « Sò nati 100 zitelli à u viranu, mà di a so vita elli chì faranu ? » A strada di u passatu traccia quella di l’avvene, è di sicuru, Antone a pinsava cusì. Hè quessa a vittoria contru à a morte. È cum’ella hè ghjusta a canzona d’Alfredo de Robertis : « à petu à l’Ande, ci caschede a sumente : nè u focu, nè u cotru ùn la pudaranu distrughje, un fiore di sangue suminede a guerrilla, quellu rossu, invincibule di a Libertà. »

Hè natu un fiore giallu In chjosu di verdura Nisunu hà primura D’innuchjallu.

Hè natu un pesciu è pare Culuritu di gioia Caccia à l’acqua la noia Di u mare.

Scorsa la to vita Cum’è ventu Si n’hè sparita Si n’hè finita Hè firmatu spaventu E la mio vita.

Hè natu angusciosu Dubitu, in la mio mente Chi st’anima ùn risente Riposu

Hé natu un pecurellu Ind’e l’altu pascile Vicinu à u fucile D’un pasturellu.

Sò nati centu zitelli A tempu à u veranu Ma di a so vita elli Chi feranu ?

Scorsa la to vita Cum’è ventu Si n’hè sparita Si n’hè finita Hè firmatu spaventu E la mio vita.

Scorsa la to vita Cum’è ventu Si n’hè sparita Si n’hè finita Hè firmatu spaventu E la mio vita.

Ferita.